خيمت حالة من الحزن الشديد بين جميع أهالى قرية برهيم التابعة لمركز منوف بمحافظة المنوفية بعد إعلان أسرة المهندس حنفي لبيب بوفاته داخل مستشفي الجامعة بشبين الكوم متأثرا بحروق بنسبة وصلت ل ٩٠%، حيث تم تشييع جثمانه منذ قليل فى جنازة مهيبة من جميع أبناء القرية.
حيث شهدت قرية برهيم مأساة كبيرة يعيشها أسرة المهندس حنفي لبيب بعد ان أشعل ابن شقيقه النار فيه أمام بيته وسط دهشة وصراخ الأهالى لتتحول المنطقة إلى ساحة نيران ودخان .
وقالت هبة ابنة المجنى عليه إن والدها كان بيحب كل الناس وكان بيعتبر ابن أخوه زى ابنه لكنهم اتفاجئوا يوم الحادث بصوت خناقة فى الشارع وسمعوا أبوها بيقول عيب اللى بتعمله ده أنا عمك وبعدها بثوانى النيران ولعت فيه وهو بيجرى بيقول الحقونى النار ولعت فيا .
وأضافت أن الجيران حاولوا يطفوا النار عليه بالرمل والبطاطين لكن الحريق كان شديد جدا وإنهم نقلوه بسرعة لمستشفى منوف العام وبعدها لمستشفى جامعة المنوفية لأنه اتحرق بنسبة تسعين فى المية.
واستكملت منى ابنته الثانية الحديث قائلة.. إنهم عاشوا لحظات رعب وإن أمهم كانت بتصرخ وهى شايفة والدهم بيولع قدامها والناس كلها فى حالة ذهول وإن المتهم جاب مادة مشتعلة وسكبها عليه وولع فيه قدام عينه .
وأكدت أن والدها ماكانش له عداوة مع حد وإنه كان راجل طيب يعامل الكل بمحبة وإن كل اللى بينهم خلاف بسيط على ميراث قديم لكن لم نتخيل إن حياته سوف تنتهي بهذه الطريقة البشعة .
وتحدث أهالى القرية إن المتهم بعد الحادث حاول يولع فى التبن جنب الحظيرة وكاد الحريق ينتشر للمنازل لولا تدخل الجيران اللى قدروا يسيطروا على النيران وينقذوا البهايم من الموت .
وقال مصدر أمنى إن قوات الشرطة تمكنت من القبض على المتهم فى وقت قصير وضبطوا بحوزته زجاجة فيها مادة سريعة الاشتعال ، وأكدت التحريات وجود خلافات عائلية قديمة كانت سبب الواقعة وتم نقل المصاب فى حالة حرجة للمستشفى وتحرير محضر بالواقعة تمهيدًا لعرضها على النيابة.
